Tadhana Quotes

Siguro ganun talaga ang buhay. May mga bagay na kahit anong buhos mo ng effort o kahit gaano pa ang tindi ng kagustuhan mong makuha ay hindi mapapasaiyo kung hindi nakatakda sa isang invisible na script na kung tawagin ay tadhana.

Akala ko noon pinakamalaking problema ko na ang naging problema ko sa eskuwela. Malayo pala sa katotohanan. Pero maaga akong tinuruan nito na maging matibay, at natuto agad akong pumili ng kakapitan. Napakahalaga noon dahil doon nakasalalay kung magpapadurog ka sa tadhana o magpapahulma nang matibay.

Maraming pagbabago sa mundo ngayon na mas nakakapagpahina ng lakas ng taong pagpasyahan o buoin ang sariling tadhana. Ang pagtakas natin sa mga nararamdaman nating lumbay at paglaho ng pagkatao sa mga bagay na idinidikta ng ibang mas malalakas na tao, ang pagkalimot sa maliliit na bubot ng kaligayahan kapalit ng mga tropeong pinag-aagawan pero wala naman talagang saysay sa mga huli mong sandali.

Pinanday ng apoy at alon. Pinagbuklod ng tadhana... ng pag-ibig. At patuloy na nakikinaka at patuloy na nakikisabay sa tinikling ng daigdig. Itong mga Perlas na hinumog ng galit at lambing. Itong Lupang Hinirang.

Laro ang lahat sa buhay ng tao. Laro ng ako at hindi ako, pagtatalaban ng kapalaran at tadhana, ng kalayaan at pagkatakda, at ng kasalukuyan, hinaharap at nakaraan. Upang maisatupad niya ang dapat, ang kaniyang katalagahan sa larong ito, kailangan ng tao ng tunay na kakayahang unawain ang nagpepresensiya nang tapat sa pagdirito nito.